“Një trup i pajetë u mor nga ambulanca”, gjithçka ndodhi në Lion të Francës


IMG_20190804_182213_757

Zyra e prokurorit kombëtar kundër terrorizmit ishte informuar, por nuk ka marrë përgjegjësinë e çështjes në këtë fazë. Majin e kaluar, një bombë përpara dyqanit të një furre buke në Lyon qendror la 14 persona të plagosur.

Dy burra të armatosur me thika dhe me hanxhar kanë terrorizuar metronë në Lion të Francës. Si pasojë e sulmit, një 19-vjeçar u vra dhe nëntë të tjerë janë plagosur, 3 prej të cilëve janë në gjendje të rëndë për jetën, tha një zyrtar rajonal dhe shërbime emergjente.

Dy burra, njëri i armatosur me thikë dhe tjetri me një kamxhik, kryen sulmin në Villeurbanne, zonë periferike e Lionit, në Francën juglindore, tha zyrtari, pa dhënë detaje të tjera mbi motivin e goditjes me thikë, shkruajnë mediat franceze dhe ato botërore.

Një nga burrat që kreu sulmin u arrestua nga policia, ndërsa tjetri është në arrati. Sulmi ndodhi afër një stacioni metroje. Një gazetar i AFP në vendngjarje tha se ka parë një trup të marrë në një ambulancë dhe gjurmë gjaku në tokë.

Zyra e prokurorit kombëtar kundër terrorizmit ishte informuar, por nuk ka marrë përgjegjësinë e çështjes në këtë fazë. Majin e kaluar, një bombë përpara dyqanit të një furre buke në Lyon qendror la 14 persona të plagosur lehtë.

Autori i krimit të ngjarjes së asaj kohe, një algjerian i ri i radikalizuar, i cili u arrestua tre ditë më vonë, u zotua për besnikëri ndaj grupit të Shtetit Islamik, sipas rrëfimit të tij. Lyon, qyteti i tretë i Francës, deri atëherë kishte mbetur i paprekur nga vala e sulmeve xhihadiste që ka vrarë 251 njerëz në Francë që nga viti 2015. /Dionis Xhafa/

 

 

 

 

 

Vrau 2 gra më 1973, arrestohet pas provave të ADN-së


SHBA

Media e njohur amerikane “New York Times” shkruan se policia ka arrestuar këtë të mërkurë një 80-vjeçar i quajtur Ernest J. Broadnax, banues në Nju Jork, i dyshuar për vrasjen e 2 grave të reja në një plazh në vitin 1973.

Broadnax njihej nga policia si person tepër problematik me ligjin, pasi në 30 vjet është arrestuar 14 herë nën akuza për vjedhje, sulme e grabitje. Ai ka qenë tri herë në burgje. Madje, kishte pasur probleme të theksuara edhe me alkoolin e drogën.

Por asnjë nga krimet që kishte bërë më herët nuk ishte më i rëndë sesa ai për të cilin akuzohet sot në moshën 80-vjeçare. Këtë javë, policia në Queens arrestoi Broadnax për vrasjen e 2 grave të reja në vitin 1973 në një plazh në Virxhinia.

Vrasja e grave ishte arkivuar në atë kohë, për shkak të mungesës së provave. Dosja u hap pas gjetjes së disa shenjave në trupin e grave të vrara Lynn Seethaler dhe Janice Pietropola, të dyja 19 vjeçe. Provat e ADN-s të gjetura në vendngjarje ishin identike me ato të Ernest Broadnax.

Vrasësi i dyshuar u arrestua për vrasje dhe një akuzë për përdhunim. Ai po mbahet në një vend të sigurt në Nju Jork. “Objektivi ynë tani është të jemi në gjendje të sjellim drejtësi për viktimat dhe familjet e tyre të jenë në gjendje të kenë një ndjenjë paqeje “, tha zyrtarja Linda Kuehn, një zëdhënëse e policisë në Virginia Beach.

Detektivi në pension Uilliam Haden tha se vrasja e grave të reja në atë kohë kishte qenë brutale.

(d.xh/ Balkanweb)

“U tradhtuam nga shteti”, flet i infiltruari i mafies në Itali


Gianfranco Franciosi, një ish-spiun për shtetin italian ose Giannino ka qenë një i infiltruar për mafien në Itali, i cili as që binte në sy të bandave për shkak të aftësisë së tij të jashtëzakonshme për t’u sjellë sikur të ishte realisht një trafikant droge.

Për katër vjet, Gianfranco Franciosi, ose Giannino si të gjithë e quajnë atë, u besua nga të gjithë, nga mafiozët italianë te baronët e drogës kolumbiane dhe spanjolle. Ai ishte në gjendje të transformonte një gomë të vjetër në një Ferrari, anije kontrabandë perfekte për të mbajtur ton kokainë. Ai gjithashtu do të mundte të prodhonte edhe vetë pajisje përgjimi, aq profesional ishte bërë në “punën” e tij.

Më datë 26 shkurt 2019, inteligjenca që e kishte porositur këtë të infiltruar, arriti të çmontojë një kartel droge, ku u kapën 9 tonë kokainë. Atë ditë puna e Giannino si një informator policie kishte mbaruar. Njohur si Donnie Brasco i Italisë sipas emrit të një agjenti amerikan të FBI-së që godiste mafien në Nju Jork në vitet 1970 – 1980, Giannino tani jeton aspak i qetë në veriun e Italisë. Pasi u përdor për të shkatërruar trafikantë droge me rëndësi, ai tani përballet me borxhet dhe kërcënimet me vdekje. I infiltruari akuzon tani autoritetet italiane se e kanë braktisur atë. “Unë tradhtova trafikantët, por duket se tashmë jam vetë i tradhtuar nga shteti italian”, tha ai, shkruan “Guardian”.

Giannino është një nga shumë ish-informatorët e policisë dhe dëshmitarët e shtetit të përdorur në operacionet e antimafiave, të cilët pastaj u bënë viktima të një sistemi të thyer që nuk është në gjendje të ofrojë siguri dhe mbështetje, kryesisht për shkak të kufizimeve buxhetore. Shumë persona që janë infiltruar dhe kanë dashur të shkatërrojnë mafien, pak mbështetje kanë gjetur nga shteti i Italisë dhe ndihen thuajse të braktisur. Të tjerët janë larguar nga vendi dhe disa prej tyre, me peshë të borxhit kanë pësuar depresion, ndërsa ka pasur edhe nga ata që kanë kryer vetëvrasje. Rocco Greco, një biznesmen nga Gela në Sicili, u vetëvra këtë muaj pasi kompania e tij u vendos rastësisht nga ministri i Brendshëm në një listë të bizneseve të dyshuar për lidhje me mafien, duke ndaluar firmën e tij nga oferta për kontrata publike.

 

Giannino shprehet se ka tentuar vetëvrasjen tri herë. “Tri herë e kam parashikuar vetëvrasjen. Kjo ndodh kur nuk ke mbështetjen nga shteti dhe ndihesh sikur je një mbeturinë”, deklaroi ai. Informacioni i mbledhur nga informatorët e policisë dhe dëshmitarët shtetërorë është një nga instrumentet më efektive kundër klaneve mafioze, por çmimi që ata paguajnë mund të jetë i lartë. Lista e të vrarëve është e gjatë dhe vazhdon të rritet. Më i fundit ishte në Ditën e Krishtlindjeve vitin e kaluar, kur vëllai i një anëtari mafioz u kthye në informator, u qëllua nga dy burra të maskuar në atë që policia besonte se ishte një sulm i urdhëruar nga ‘Ndrangheta’, një nga grupet më të fuqishme mafioze të Italisë.

Tommaso Buscetta, zbulimet e të cilit në vitet 1980 bënë një goditje vdekjeprurëse ndaj mafias siciliane më të famshme, Cosa Nostra, mund të kishin paguar çmimin më të lartë. Ndërmjet viteve 1982 dhe 1984, vëllai i tij, dhëndri, kunati dhe katër nipërit e mbesat u vranë dhe dy djem u zhdukën. Në Itali, problemi i njohjes gjyqësore dhe mbrojtjes së dëshmitarëve është bërë serioz dhe i përhapur. Sipas të dhënave zyrtare nga Ministria e Brendshme italiane, rreth 6 200 njerëz janë nën mbrojtjen e dëshmitarëve në Itali, duke përfshirë edhe anëtarët e familjes. Në përgjithësi, dëshmitarëve shtetërorë paguhen një pagë mujore prej 1,000 € deri në 1,500 € secili, plus një shtesë prej 500 € në muaj për secilin anëtar të familjes. Por, shteti nuk ka më fuqi ekonomike për të mbështetur këta njerëz. Ministri i Brendshëm i Italisë Mateo Salvini tha se do të shqyertojë situatën për mbrojtjen e dëshmitarëve. /Dionis Xhafa – Balkan Web/

 

 

 

Kush është Brenton Tarrant, terroristi australian që terrorizoi Zelandën e Re, adhurimi për kriminelin serb Radovan Karaxhiç


Zelandë e Re – Policia australiane ka identifikuar tashmë terroristin e dyshuar të masakrës me së paku 49 persona të vdekur në dy xhami në Zelandë të Re. Ai quhet Brenton Tarrant. Mediat ndërkombëtare kanë shkruar rreth biografisë që njeriut që ka tronditur opinionin publik në Oqeani dhe në mbarë globin.

Tarrant ka dyshime se është personi që ka sulmuar me armë zjarri xhaminë e Al Noor në Christchurch të Zelandës së Re dhe ka publikuar pamjet e tmerrit live në “Facebook”. Dyzet e një vetë u qëlluan për vdekje në xhaminë e Deans Ave, shtatë u vranë në sulmin e Linwood Ave dhe një person i qëlluar në sulmin e dytë të xhamisë vdiq në spital.Shefi i Policisë së Zelandës së Re, Mike Bush konfirmoi të premten pasdite se policia kishte arrestuar katër vetë, tre burra dhe një grua. Sulmi ka ndodhur në një moment që xhamitë ishin thuajse plot, prandaj viktimat janë të shumta. Nga policia thanë se nuk mund të thuhet se “kërcënimi ka mbaruar”.

Mediat e huaja ndërkaq kanë shkruar për Brenton Tarrant sidomos, personin që besohet se është “truri i masakrës”. Tarrant besohet se është një anti-mysliman i devotshëm. Kjo pasi ai publikonte herë pas here imazhe dhe mesazhe të qarta kundër emigrantëve dhe myslimanëve. Mediat bëjnë me dije se ai kishte “një urrejtje të thellë” ndaj islamit. Mediat australiane raportojnë se autori kryesor i masakrës Brenton Tarrant është rritur në Grafton, Australi. Në pyetjen e oficerëve të policisë, se përse e ka kryer krimin e tmerrshëm me shumë viktima, ai kishte thënë “për hakmarrje”. Ai ka shtuar: “Ne duhet që të zhvillojmë një të ardhme për ne dhe fëmijët e bardhë”. Tarrant tha se sulmin e ka kryer kundër pushtuesve, që kanë kryer krime historikisht në Europë.

Tarrant e ka përshkruar veten si një “ultra-nacionalist” dhe “ento-fashist”. Ndërsa idetë e tij duken të lëkundura, pasi më herët kishte thënë se është komunist, anarkist dhe liberal. Ai shkroi se besonte në “autonominë etnike për të gjithë popujt me një fokus në ruajtjen e natyrës dhe rendit natyror”. Ai tha gjithashtu se do të hakmerrej për Ebba Akerlund, 11 vjeçe, e cili u vra në një sulm terrorist të vitit 2017 në Stokholm. Tarrant tha se vdekja e 11-vjeçares në Stokholm kishte qenë indicia e parë që e ka shtyrë për të kryer sulmin.

Ai urrente të huajt që bëjnë krime në Europë, ndërsa si hero të tij mbante edhe Milos Kopiliç, heroi serb që ka vrarë Sulltanin në Betejën e Kosovës. Edhe emrat e tjerë që ai kishte për zemër janë të gjithë luftëtarë që kanë luftuar kundër Perandorisë Osmane. Mes emrave janë Bajo Pivljanin dhe Novak Vujosevic, kryengritës serbë antiosmanë, si dhe gjenerali malazez Marko Miljanov.

Gjithashtu të shkruara në armë dhe municione ishin referenca për Betejën e Vjenës të vitit 1683, në të cilën forcat e krishtera mundën osmanët dhe 1571, një referencë e dukshme në Betejën e Lepantos, në të cilën Perandoria pësoi një tjetër humbje. Muzika që luhej në makinën e tij gjatë sulmit ishte serbe dhe gjermane e se ka dyshime se ishte një këngë kushtuar kriminelit serb të luftës Radovan Karaxhiç. Në shkrimin e tij, Tarrant i bëri jehonë pikëpamjeve të shprehura nga Anders Breivik, terroristi norvegjez i krahut të djathtë, i cili vrau 77 vetë me një bombë me kamion dhe një masakër me armë në Norvegji në vitin 2011. /Dionis Xhafa/

 

 

 

Ish-presidenti kroat, mik i shqiptarëve: Serbia të njohë Kosovën, pastaj të diskutohen kufijtë


dionis1

Ish-presidenti i Kroacisë Stepe Mesiç ka ftuar Serbinë që të njohë fillimisht Kosovën dhe pastaj të ulet në tryezë të bisedimeve, për të diskutuar për ndryshim të mundshëm kufijsh.

“Unë nisem nga ajo se arkitektura e vendeve europiane, këtu përfshij edhe Kosovën, ka përfunduar. Pra, kur një ditë Beogradi dhe Prishtina të vendosin marrëdhënie normale, atëherë mund të flitet për ndonjë çështje alogjike në ndonjë pjese të kufirit. E dini, asnjë kufi nuk është deri në fund ‘letër e shenjtë’ që të mos ndryshojë diçka, por së pari duhet njohur shtetin me të cilin bisedohet”, tha ish-presidenti i shtetit kroat.

Mesiç që ka qenë presidenti i Kroacisë për 10 vjet tha se Beogradi nuk duhet të bëjë sikur nuk kupton dhe se duhet të vendosë raporte normale me Prishtinën. Ai shtoi se Kosova është shtet e se ky realitet duhet njohur. /Lajm – Dionis Xhafa

 

 

 

 

Çfarë po ndodh në Venezuelë? Maduro përballet me “rrethim diplomatik”


dionis xhafa1

Dionis Xhafa

Presidenti i Venezuelës Nikolas Maduro mund të përballet me disa sanksione, thanë udhëheqës rajonalë, pasi trupat e tij ndezën konvojet e ndihmave të huaja në kufi me Brazilin, duke i konsideruar ato “ndihma të huaja”  dhe kriminale, ndërsa rivalët kanë bërë thirrje për një “përpjekje çlirimtare”.

Trupat besnike ndaj Maduro u përplasën me dhunë me konvojet e ndihmës që kërkonin të hynin në Venezuelë të shtunën, duke lënë gati 300 të plagosur në përleshjet me forcat e sigurisë dhe të paktën tre protestues të vdekur pranë kufirit brazilian.

Juan Guaido, i njohur nga shumica e vendeve perëndimore si lideri i ligjshëm i Venezuelës, u kërkoi fuqive të huaja të marrin në konsideratë “të gjitha opsionet” në rrëzimin e Maduro, përpara një takimi të Grupit rajonal Lima të kombeve në Bogota të hënën, ku do të ndiqet nga nënpresidenti amerikan Mike Pence.

“Brazili i bën thirrje komunitetit ndërkombëtar, veçanërisht atyre vendeve që ende nuk e kanë njohur Juan Guaido si president të përkohshëm, për t’u bashkuar me përpjekjet çlirimtare të Venezuelës”, thuhet në një deklaratë të Ministrisë së Jashtme braziliane. Brazili, ekonomia më e madhe në Amerikën Latine ka qenë aleat me Venezuelën, ndërsa së fundmi është bërë armike e Venezuelës. Sekretari i Shtetit i SH.B.A.-së Mike Pompeo i tha CNN të dielën: “Duhen marrë më shumë sanksione. Ka më shumë ndihmë humanitare që mendoj se mund të japim”.

Kina dhe Rusia, të cilat të dyja kanë investime të mëdha në sektorin e energjisë në Venezuelë, kanë mbështetur qeverinë e Maduro dhe kanë dënuar sanksionet e SHBA. Ndërkohë, presidenti kolumbian Ivan Duque tha se Maduro ka ndërtuar një diktaturë dhe bëre thirrje për të rrëzuar atë. Kamionët e ngarkuar me ushqim dhe ilaçe të SHBA në kufirin kolumbian u përpoqën vazhdimisht të shtyheshin, madje është përdorur gaz lotsjellës dhe të tjera metoda që të mos lejohen. Duhet të presim ditët në vazhdim, ku për çështjen do të ketë diskutime me rëndësi të liderëve globalë, për të mësuar edhe se çfarë do të ndodhë me Venezuelën dhe situatën atje.

 

 

Raporti dramatik: Policia greke abuzon dhe rreh emigrantët që hyjnë nga Turqia


Dionis Xhafa

Human Rights Watch (HRW) ka publikuar pamjet dramatike, teksa policia greke ushtron dhunë ndaj emigrantëve të ligjshëm dhe të paligjshëm kryesisht, të cilët tentojnë të hyjnë nga Turqia në shtetin helen. Në mesin e emigrantëve ka shumë azilkërkues, që hyjnë në Greqi përmes kufirit tokësor.

Pamjet janë të qarta dhe ata shfaqin dhunën që ushtron policia greke mbi emigrantët. Zakonisht, dhuna ushtrohet te azilkërkuesit në zonat kufitare ndërmjet Greqisë dhe Turqisë. HRW bën me dije se policia greke ka marrë pjesë aktive në abuzimin shtetëror, me dhunë ndaj azilkërkuesve. Ka dëshmi se azilkërkuesit janë marrë në stacionet policore në Edirne, Turqi dhe në Greqi dhe aty janë dhunuar, janë detyruar që të dalin natën në të ftohtë e të kthehen prapë në vendin ku qëndrojnë prej një kohë të gjatë. Është zbuluar se një vajzë e re, refugjate 19 vjeçe, shtatzënë është detyruar të kthehet me forcë në vendin e origjinës.

Zyrtarët grekë mohojnë se të ketë abuzime ndaj emigrantëve, por organizmat ndërkombëtarë shprehen se ka shkelje të të drejtave të njeriut, në mënyrë të përsëritur, në kohë dhe vende të ndryshme të Greqisë. “Ne vazhdojmë të marrim një numër të konsiderueshëm raportesh të besueshme për kthimet e detyruara joformale në Turqi përmes rajonit të Evros”, tha Leo Dobbs, zëdhënësi i agjencisë së Refugjatëve të Kombeve të Bashkuara në Athinë. “Raportet e tilla janë me interes të thellë për UNHCR-në. Ne në shumë raste i kemi ndarë këto shqetësime me autoritetet greke dhe kemi kërkuar hetime për të parandaluar krime dhe incidente më të rënda”.

Për herë të parë, del se azilkërkuesit dhe refugjatët zgjedhin më shumë rrugët tokësore se ata ajrore, duke kaluar shumë drejt lumit Ervos. Ka shumë turq që ikin nga Turqia, duke pretenduar përndjekje politike në Turqi. HRW ka thënë se emigrantët janë më shumë nga vende të tilla si Afganistani, Iraku, Siria, Maroku, Pakistani, Tunizia dhe Jemeni. Ndërsa dimri ka ardhur, ka shumë njerëz që vdesin prej temperaturave të ulëta, teksa janë duke kaluar lumin Evros. Pasi në Greqi, azilkërkuesit janë në gjendje të lëvizin lirisht në kontinent, në kontrast të thellë me ishujt ku ata janë të detyruar të qëndrojnë shpesh në kushte të mjerueshme. Georgios Kossioris, drejtor i policisë greke ka mohuar dhunën e forcave policore, ndërsa sipas tij gjithmonë, do të ndiqet penalisht çdo polic që abuzon me refugjatët.